പൊതുവിദ്യാഭ്യാസ മേഖലയെയും ഭിന്നശേഷി കുട്ടികളുടെ പുനരധിവാസ പ്രവർത്തനങ്ങളെയും ഒന്നുപോലെ ഞെട്ടിച്ച സംഭവമാണ് പേരാമ്പ്ര ബി.ആർ.സിയുമായി ബന്ധപ്പെട്ട് ഉയർന്നുവന്ന ലഹരിക്കേസ്. സ്പെഷ്യലിസ്റ്റ് അധ്യാപകരായ രണ്ടുപേരും, ഓട്ടിസം സെന്ററില് പ്രവർത്തിക്കുന്ന ഒരു സ്പെഷ്യൽ എജുക്കേറ്ററുമാണ് ലഹരിക്കേസിൽ പിടിയിലായത്. എന്നാൽ, ഈ പിടിയിലായ സ്പെഷ്യൽ എജുക്കേറ്ററുടെ പേരിൽ സംസ്ഥാനമൊട്ടാകെയുള്ള സ്പെഷ്യൽ എജുക്കേറ്റർമാർ ആരോപണ വിധേയരാക്കപ്പെടുന്നതിനു പിന്നിലെ സാമൂഹിക ഔചിത്യം എന്താണെന്നു കൂടി വിലയിരുത്തപ്പെടേണ്ടതുണ്ട്.
ഭിന്നശേഷിക്കാരായ കുട്ടികൾക്ക് താങ്ങും തണലുമാകേണ്ട ഒരു സ്ഥാപനത്തിൽ നിന്ന് ഇത്തരമൊരു വാർത്ത പുറത്തുവന്നത് സമൂഹത്തിൽ വലിയ അമർഷത്തിനും ആശങ്കയ്ക്കും കാരണമായിട്ടുണ്ട്. എന്നാൽ, ഈ സംഭവത്തിന്റെ പേരിൽ സ്പെഷ്യൽ എജുക്കേറ്റർമാരെയും ബി.ആർ.സി ജീവനക്കാരെയും ഒന്നടങ്കം സംശയത്തിന്റെ നിഴലിൽ നിർത്തുന്നതും ക്രൂശിക്കുന്നതും വസ്തുതാപരമല്ലെന്ന് മാത്രമല്ല, ആ മേഖലയോട് ചെയ്യുന്ന വലിയൊരു അനീതി കൂടിയാണ്.
ഒരു കുറ്റകൃത്യം നടക്കുമ്പോൾ അത് വ്യക്തിപരമായ വീഴ്ചയാണോ അതോ വ്യവസ്ഥാപിതമായ പരാജയമാണോ എന്ന് വേർതിരിച്ചു കാണേണ്ടതുണ്ട്. കേസിൽ ഉൾപ്പെട്ട വ്യക്തികൾ ചെയ്ത തെറ്റ് അപലപനീയവും അർഹിക്കുന്ന പരമാവധി ശിക്ഷ ഉറപ്പാക്കേണ്ടതുമാണ്. എന്നാൽ, ഏതാനും വ്യക്തികൾ കാണിക്കുന്ന അനാസ്ഥയുടെയും കുറ്റകൃത്യങ്ങളുടെയും പേരിൽ ഒരു സമൂഹത്തെ മുഴുവൻ പ്രതിക്കൂട്ടിൽ നിർത്തുന്നത് ശരിയായ പ്രവണതയല്ല. ഭിന്നശേഷിയുള്ള കുട്ടികളെയും അവരുടെ കുടുംബങ്ങളെയും ചേർത്തുപിടിച്ച്, തുച്ഛമായ വേതനത്തിലും പ്രതികൂല സാഹചര്യങ്ങളിലും അതിരറ്റ ക്ഷമയോടെ ജോലി ചെയ്യുന്നവരാണ് വലിയൊരു വിഭാഗം സ്പെഷ്യൽ എജുക്കേറ്റർമാരും. സംഭവം പുറത്തുവന്നതോടെ ‘സ്പെഷ്യൽ എജുക്കേറ്റർമാർ മുഴുവൻ മോശക്കാരാണ്’ എന്ന രീതിയിൽ സോഷ്യൽ മീഡിയയിലും പൊതുസമൂഹത്തിലും നടക്കുന്ന പ്രചാരണങ്ങൾ, വർഷങ്ങളായി ഈ മേഖലയിൽ സത്യസന്ധമായി സേവനമനുഷ്ഠിക്കുന്ന നൂറുകണക്കിന് അധ്യാപകരുടെ ആത്മവീര്യം കെടുത്താൻ മാത്രമേ ഉപകരിക്കൂ. സ്പെഷ്യൽ എജുക്കേറ്റർമാർ അധ്യാപകരല്ലെന്നും, ദത്തശേഖരണമാണ് ഇവരുടെ പ്രധാന ജോലിയെന്നും വരെ ആക്ഷേപിക്കുന്നതായി ചില സോഷ്യൽ മീഡിയ പോസ്റ്റുകളിൽ കാണുകയുണ്ടായി. സ്പെഷ്യൽ എജുക്കേറ്റർമാരെ താറടിച്ചു കാണിക്കാനുള്ള ബോധപൂർവ്വമായ ഒരു ശ്രമം ഇതിന്റെ പുറകിലുണ്ടെന്നു വരെ സംശയിക്കേണ്ടിയിരിക്കുന്നു.
തെറ്റ് ചെയ്തവർ ആരായാലും അവർക്ക് നിയമം അനുശാസിക്കുന്ന കടുത്ത ശിക്ഷ ഉറപ്പാക്കുക തന്നെ വേണം; ഭിന്നശേഷി കുട്ടികളുടെ സുരക്ഷിതത്വത്തെ ബാധിക്കുന്ന ഒരു വിട്ടുവീഴ്ചയും ഇവിടെ പാടില്ല. സംഭവത്തിൽ വിപുലവും നിഷ്പക്ഷവുമായ അന്വേഷണം നടത്തുകയും, ബി.ആർ.സികളുടെ പ്രവർത്തനം കൂടുതൽ സുതാര്യമാക്കാൻ കൃത്യമായ മോണിറ്ററിംഗ് സംവിധാനം ഏർപ്പെടുത്തുകയും ചെയ്യേണ്ടത് അനിവാര്യമാണ്. ഒപ്പം തന്നെ, തെറ്റുകാർക്കെതിരെ കടുത്ത നടപടിയെടുക്കുമ്പോഴും, ആത്മാർത്ഥമായി ജോലി ചെയ്യുന്ന മറ്റ് ജീവനക്കാർക്ക് മാനസിക പിന്തുണ നൽകാനും അവരുടെ ആത്മവിശ്വാസം വീണ്ടെടുക്കാനും ഭരണസംവിധാനങ്ങൾ മുന്നോട്ടുവരണം.
ഒരു തോട്ടത്തിലെ ഏതാനും ചീഞ്ഞ ഫലങ്ങൾ കാരണം ആ തോട്ടം മുഴുവൻ വെട്ടിമാറ്റാറില്ല എന്നതുപോലെ, ചിലരുടെ വ്യക്തിപരമായ തെറ്റുകളുടെ പേരിൽ ഒരു സമൂഹത്തെ ആകെ നിന്ദിക്കുന്നത് ശരിയായ നീതിയല്ല. തെറ്റ് ചെയ്തവർ തീർച്ചയായും മാതൃകാപരമായി ശിക്ഷിക്കപ്പെടട്ടെ; എന്നാൽ രാപകലില്ലാതെ ഭിന്നശേഷിക്കുട്ടികളുടെ വെളിച്ചമായി പ്രവർത്തിക്കുന്ന ഭൂരിപക്ഷം വരുന്ന സ്പെഷ്യൽ എജുക്കേറ്റർമാരുടെ ത്യാഗത്തെ തമസ്കരിക്കാതിരിക്കാൻ പൊതുസമൂഹം ജാഗ്രത പാലിക്കേണ്ടതുണ്ട്.
