അഞ്ചരക്കണ്ടി ഡെന്റല് കോളേജ് വിദ്യാര്ഥി നിതിന് രാജിന്റെ മരണം ആത്മഹത്യയല്ല, മറിച്ച് വ്യക്തമായ ആസൂത്രണത്തോടെ നടന്ന കൊലപാതകമാണെന്ന സംശയങ്ങളെ ബലപ്പെടുത്തുന്നg സാഹചര്യ തെളിവുകള്.
1. പോസ്റ്റ്മോര്ട്ടം റിപ്പോര്ട്ടിലെ ഞെട്ടിക്കുന്ന വിവരങ്ങള്
സാധാരണഗതിയില് കെട്ടിടത്തിന് മുകളില് നിന്ന് ചാടി മരിക്കുന്ന ഒരാളുടെ ശരീരത്തില് വീഴ്ചയുടെ ആഘാതത്തിലുള്ള പരിക്കുകളാണ് ഉണ്ടാവുക. എന്നാല്, നിതിന് രാജിന്റെ പോസ്റ്റ്മോര്ട്ടം റിപ്പോര്ട്ടില് ശരീരത്തിന്റെ വിവിധ ഭാഗങ്ങളില് അടിയേറ്റ പാടുകളും അസ്ഥികള്ക്ക് പൊട്ടലുകളും ഉള്ളതായി രേഖപ്പെടുത്തിയിട്ടുണ്ട്. തലയിലും നെഞ്ചിലുമേറ്റ മാരകമായ പരിക്കുകളാണ് മരണകാരണം. വീഴുന്നതിന് മുന്പ് തന്നെ നിതിന് ക്രൂരമായ ശാരീരിക ആക്രമണത്തിന് ഇരയായിരുന്നു എന്നതിന്റെ വ്യക്തമായ തെളിവാണിത്.
2. സിസിടിവി ദൃശ്യങ്ങളിലെ ‘കൂട്ടവിചാരണ
മരണത്തിന് തൊട്ടുമുന്പ് അധ്യാപകര് നിതിനെ ഒരു മുറിയില് തടഞ്ഞുനിര്ത്തി കൂട്ടവിചാരണ ചെയ്യുന്ന ദൃശ്യങ്ങള് ഇപ്പോള് പുറത്തുവന്നിട്ടുണ്ട്. കോളജ് അധികൃതര് അവകാശപ്പെടുന്നത് പോലെ ഒരു സാധാരണ അച്ചടക്ക നടപടിയായിരുന്നില്ല അവിടെ നടന്നത് എന്ന് ഈ ദൃശ്യങ്ങളില് നിന്ന് വ്യക്തമാണ്. മാനസികമായും ശാരീരികമായും ആ മുറിയില് വെച്ച് നിതിന് ആക്രമിക്കപ്പെട്ടു എന്ന് കരുതാന് ന്യായമായ കാരണങ്ങളുണ്ട്.
3. തിരക്കഥ ചമച്ച പരാതിയും സമയക്രമവും
നിതിന് മരിക്കുന്നതിന് തൊട്ടുമുന്പ് അധ്യാപിക പരാതി എഴുതിക്കൊണ്ടിരിക്കുകയായിരുന്നു എന്ന കോളേജ് അധികൃതരുടെ വാദം തികച്ചും സംശയാസ്പദമാണ്. മര്ദ്ദനമേറ്റ് അബോധാവസ്ഥയിലായതൊ കൊല്ലപ്പെടുകയൊ ചെയ്ത നിതിനെ കെട്ടിടത്തിന് മുകളില് നിന്ന് താഴേക്ക് എറിഞ്ഞ ശേഷം, അതൊരു ആത്മഹത്യയാക്കി മാറ്റാന് ഉണ്ടാക്കിയെടുത്ത നാടകമാണോ ഈ പരാതി എന്ന് സംശയിക്കേണ്ടിയിരിക്കുന്നു. മരണം ഉറപ്പാക്കിയ ശേഷം ഒരു ‘ലോണ് ആപ്പ്’ കഥ കൂടി ഇതിലേക്ക് കൂട്ടിച്ചേര്ത്തത് പ്രതികളെ സംരക്ഷിക്കാനുള്ള ബോധപൂര്വ്വമായ നീക്കമായി കാണാം.
4. പൊലീസും അധികൃതരും തമ്മിലുള്ള അവിശുദ്ധ കൂട്ടുക്കെട്ട്
ലോണ് ആപ്പുമായി ബന്ധപ്പെട്ട് പരാതി കിട്ടി എന്ന പൊലീസിന്റെ വെളിപ്പെടുത്തല് യഥാര്ഥത്തില് കേസ് വഴിതിരിച്ചുവിടാനുള്ള ശ്രമമാണ്. ഓഫീസില് മുറിയില് നടന്ന ആള്ക്കൂട്ട വിചാരണയ്ക്കുശേഷം അധ്യാപിക പരാതി എഴുതിക്കൊണ്ടിരിക്കുമ്പോഴാണ് നിതിന് രാജ് ആത്മഹത്യ ചെയ്തത് എന്നാണ് കോളേജ് അധികൃതര് പറയുന്നത്.
അപ്പോള് പൊലീസ് ലോണ് ആപ്പുമായി ബന്ധപ്പെട്ടു അധ്യാപികയുടെ പരാതി കിട്ടി എന്ന് പറയുന്നത് നിതിന് കൊല്ലപ്പെട്ട ശേഷമാകണം. ജാതി വിവേചനത്തെക്കുറിച്ചോ കോളജിനുള്ളില് നടന്ന അക്രമണത്തെക്കുറിച്ചോ അന്വേഷിക്കാതെ, അന്വേഷണത്തിന്റെ ദിശ പുറത്തുള്ള ഒരു അദൃശ്യ മാഫിയയിലേക്ക് മാറ്റുന്നത് വഴി കോളജ് മാനേജ്മെന്റിനെയും അധ്യാപകരെയും സുരക്ഷിതരാക്കാന് പൊലീസും കൂട്ടുനില്ക്കുന്നു.
5. വീട്ടിലേക്ക് പോകാന് ഒരുങ്ങിയ വിദ്യാര്ഥി
മരണത്തിന് തൊട്ടുമുന്പ് വീട്ടിലേക്ക് പോകാനുള്ള എല്ലാ തയ്യാറെടുപ്പുകളും നിതിന് നടത്തിയിരുന്നു. ആത്മഹത്യ ചെയ്യാന് പോകുന്ന ഒരാള് വസ്ത്രങ്ങള് അടുക്കി വെക്കാനോ വീട്ടിലേക്ക് മടങ്ങാനുള്ള ഒരുക്കങ്ങള് നടത്താനോ സാധ്യതയില്ല. ഇത് ഒരു പെട്ടെന്നുണ്ടായ പ്രകോപനമോ അല്ലെങ്കില് ആസൂത്രിതമായ അക്രമമോ ആണെന്ന വാദത്തിന് ശക്തി പകരുന്നു.
നിതിന് രാജിന്റെ മരണം കേവലം ഒരു ആത്മഹത്യയായി തള്ളിക്കളയാന് സാധിക്കില്ല. മര്ദ്ദനമേറ്റ പാടുകള്, കൂട്ടവിചാരണയുടെ ദൃശ്യങ്ങള്, ലോണ് ആപ്പ് കഥയിലെ വൈരുധ്യങ്ങള് എന്നിവ വിരല് ചൂണ്ടുന്നത് ഒരു ക്രൂരമായ കൊലപാതകത്തിലേക്കാണ്. ആക്ഷന് കൗണ്സിലും ബന്ധുക്കളും ആവശ്യപ്പെടുന്നത് പോലെ ഒരു സ്വതന്ത്ര ഏജന്സി അന്വേഷിച്ചാല് മാത്രമേ ഈ മരണത്തിന് പിന്നിലെ യഥാര്ഥ പ്രതികളെ നിയമത്തിന് മുന്നില് കൊണ്ടുവരാന് കഴിയൂ. ലോണ് ആപ്പ് എന്ന പുകമറയ്ക്ക് പിന്നില് പൊലീസ് മറച്ചു നിര്ത്തുന്ന യഥാര്ത്ഥ കൊലപാതകികളെ പുറത്തുകൊണ്ടുവരേണ്ടത് നീതിബോധമുള്ള സമൂഹത്തിന്റെ കടമയാണ്.
