തീരദേശ കേരളത്തിന്റെ ഹൃദയമിടിപ്പാണ് മുക്കുവ സമൂഹം. തലമുറകളായി ഈ നാടിന്റെ തീരപ്രദേശങ്ങളില് ജീവിച്ചുപോരുന്ന ഈ സമൂഹം, ഒരിക്കലും രാജ്യദ്രോഹ പ്രവൃത്തികളുമായി ബന്ധപ്പെട്ടിട്ടില്ല. മറിച്ച്, ദാരിദ്ര്യത്തിന്റെ എല്ലാ കടുത്ത മുഖങ്ങളും നേരിട്ടുകൊണ്ട് രാജ്യത്തിനും, ജനത്തിനും പോഷകമൂല്യമുള്ള ഭക്ഷണസുരക്ഷ നല്കുന്ന മുക്കുവ സമൂഹത്തിന്റെ അമൂല്യമായ അധ്വാനവും സമുദ്രജ്ഞാനവും ഈ രാജ്യത്തിന് അത്യാവശ്യമാണ്. അടിസ്ഥാന സൗകര്യങ്ങളുടെ പൊടുന്നനെയുള്ള അഭാവം, വിദ്യാഭ്യാസ സൗകര്യങ്ങളുടെ കുറവ്, പൊതുസേവന സംവിധാനങ്ങളില് നിന്നുള്ള അകലം, തൊഴില് സുരക്ഷയില്ലാത്ത അവസ്ഥ – ഇതെല്ലാം മറികടന്നാണ് മുക്കുവ സമൂഹം തങ്ങളുടെ ജീവിതം നീട്ടിപ്പിടിക്കുന്നത്. പൊതുജനങ്ങളും അധികാരികളും തുടര്ച്ചയായി അവഗണിച്ചുകൊണ്ടിരിക്കുന്ന ഈ സമൂഹമാണ് നമ്മുടെ സമുദ്രത്തെ സംരക്ഷിക്കുകയും രാജ്യത്തിന്റെ കടല് അതിര്ത്തി കാത്തുസൂക്ഷിക്കുകയും ചെയ്യുന്ന അമൂല്യമായ സേവനം നല്കുന്നത്.
മുക്കുവ സമൂഹം ഹിന്ദു, മുസ്ലിം, ക്രിസ്ത്യന് വിഭാഗങ്ങളില് ചിതറിയാണ് വസിക്കുന്നതെങ്കിലും, കടല് ജീവിതത്തിന്റെ സ്വാഭാവികതയിലൂടെ മുക്കുവര് നിര്മിച്ചെടുത്ത സാഹോദര്യബദ്ധമായ സമുദായബോധമാണ് അവരുടെ ഏറ്റവും വലിയ ശക്തി. ഈ സമുദായബോധം വേര്തിരിവുകളെ അതിജീവിച്ച് ഏകതയുടെ ജീവിതം നടത്തുന്നു. മതഭേദമില്ലാതെ എല്ലാവരെയും ഉള്ക്കൊള്ളുന്ന മുക്കുവ സമൂഹത്തിന് സമുദ്രമാണ് ഏകീകരിക്കുന്ന ശക്തി. ഈ ഒറ്റപ്പെട്ടിരിക്കാത്ത ഐക്യബദ്ധതയാണ് ‘കേരളത്തിന്റെ തീരദേശവും മുക്കുവ സമൂഹവും ഉള്പ്പെടുന്ന പ്രദേശങ്ങളെ ദേശവിരുദ്ധ ശക്തികളുടെയും രാജ്യവിരുദ്ധവാദികളുടെ പ്രവര്ത്തന കേന്ദ്രമായി’ എന്ന് പറയാന് ആരെയും പ്രേരിപ്പിക്കുന്നത്.
കേരളത്തിന്റെ തീരദേശം ചരിത്രപരമായി സാമ്പത്തിക-സാമൂഹിക അസമത്വങ്ങളുടെയും അതുമൂലം ഉണ്ടായ മത-വര്ഗീയ സംഘര്ഷങ്ങളുടെയും ഒരു മണ്ഡലമാണ്. മാറാട്, പൂന്തുറ തുടങ്ങിയ സ്ഥലങ്ങളില് നടന്ന കലാപങ്ങളും കൊലകളും ഇതിന് സാക്ഷ്യം വഹിക്കുന്നു. ഇതില് പലവിദത്താലുള്ള രാഷ്ട്രീയ- വര്ഗീയ താല്പ്പര്യങ്ങളും കടന്നുകൂടിയിട്ടുണ്ടെന്നുള്ള വസ്തുതയും നിലനിക്കുന്നു. കൂടാതെ മത്സ്യവിഭവങ്ങള്, ഭൂമി, ആധിപത്യം എന്നിവയ്ക്കായുള്ള മത്സരമായും ഇവയുടെ മറ്റൊരു കാരണമായി ഭവിച്ചിട്ടുണ്ട്.
കേരളത്തിന്റെ സാംസ്കാരിക ഭൂമികയാല് ചുറ്റപ്പെട്ട് സാഹിത്യത്തിലും, സിനിമയിലും തീരദേശം എന്നത് ‘അപരിഷ്കൃതവും’ ഹിംസാപരവുമായ ഒരു ഇടമായാണ് ചിത്രീകരിക്കപ്പെട്ടിരുന്നത്. തീരദേശ ജീവിതത്തെ അതിവൈകാരികതയും പകയും വയലന്സും നിറഞ്ഞ അപരിഷ്കൃത ഇടമായാണ് പലപ്പോഴും വിവരണം ചെയ്തുപോരുന്നത്. ‘വള്ളവും വലയും വാങ്ങാനുള്ള ചെമ്പന്കുഞ്ഞിന്റെ മോഹം, ദുനിയാവിലെ ഏറ്റവും വലിയ അത്യാര്ത്തിയാണ്’ എന്ന മാതൃകയിലുള്ള രൂപപ്പെടുത്തലുകള് തീരദേശ ജീവിതത്തിന്റെ സങ്കീര്ണ്ണതകള് മറക്കുന്നു.
കാലക്രമേണ, സാമൂഹിക ബോധവും രാഷ്ട്രീയ ഇടപെടലും മൂലം തീരദേശങ്ങള് ശാന്തമായി മുന്നോട്ട് പോകുന്ന ഒരു കാലയളവ് ഉണ്ടായിരുന്നു. സാമൂഹിക നീതിയുടെ ചോദ്യങ്ങള്ക്ക് ശ്രദ്ധ നല്കുകയും വികസന പദ്ധതികള് ശക്തിപ്പെടുത്തുകയും ചെയ്തത് ഈ പരിവര്ത്തനത്തിന് വഴിയൊരുക്കി. ഈ ശാന്തമായ സാഹചര്യത്തിനിടയിലാണ് ‘അമിത് ഷാ’ യെ പോലുള്ള സംഘ-സംഘര്ഷവാദികള് ഉള്പ്പെടെയുള്ളവര്, സംശയദൃഷ്ടിയോടെയും ഈ സാമൂഹിക ഐക്യത്തെ കലുഷിതമാക്കാനുള്ള ഉദ്ദേശ്യത്തോടെയും പ്രസ്താവനകള് നടത്തുന്നത്. കേരള തീരദേശം ദേശവിരുദ്ധ ശക്തികളുടെ പ്രവര്ത്തനകേന്ദ്രമാണെന്ന മുന്നറിയിപ്പുകള് സംസ്ഥാനം അവഗണിക്കുന്നുവെന്നാണ് കഴിഞ്ഞ ദിവസം തിരുവനന്തപുരത്ത് ബിജെപി സംസ്ഥാന നേതൃയോഗത്തില് വെച്ച് പറഞ്ഞത്.
ചരിത്രത്തില് നിന്ന് പാഠങ്ങള് എടുക്കാതെ, പഴയ മുറിവുകള് തുറക്കുകയും തീരദേശത്തെ ഒരു വിഭജനവും സംഘര്ഷവുമുള്ള ഇടമായി മാത്രം ചിത്രീകരിക്കുകയും ചെയ്യുന്ന ഈ പ്രവണത, സമൂഹത്തില് പുതിയ തരം വിഘടനം സൃഷ്ടിക്കാനാണ് ശ്രമിക്കുന്നത്. തീരദേശം ഒരു സങ്കീര്ണ്ണമായ സാമൂഹിക-സാമ്പത്തിക ചരിത്രമുള്ള പ്രദേശമാണ്. അതിന്റെ സംഘര്ഷപൂര്വമായ ഭൂതകാലം ഓര്മിക്കേണ്ടതാണ്. എന്നാല്, അതിനപ്പുറമുള്ള ശാന്തിയുടെയും മുന്നേറ്റത്തിന്റെയും കാലഘട്ടങ്ങളും നമ്മള് അംഗീകരിക്കണം. ഇന്ന്, ഈ സംവേദനാത്മകമായ സന്തുലനത്തെ ഭദ്രപ്പെടുത്തുകയും, ചരിത്രത്തെ വികൃതമാക്കി സമൂഹത്തെ വിഭജിക്കാനുള്ള ശ്രമങ്ങളെ എതിര്ക്കുകയും ചെയ്യേണ്ടതുണ്ട്.
അമിത് ഷായുടെ പ്രസ്താവന മുക്കുവ സമൂഹത്തെ രാജ്യദ്രോഹവുമായി ബന്ധിപ്പിക്കുന്ന രീതിയില് പറഞ്ഞത് വെറും അജ്ഞത മാത്രമല്ല, മറിച്ച് ഒരു സമൂഹത്തിനെതിരായ ആഴത്തിലുള്ള അവഹേളനവും മാനഹാനിയുമാണ്. രാത്രി-പകല് എന്ന വ്യത്യാസമില്ലാതെ സമുദ്രത്തിലിറങ്ങി നമ്മുടെ തീരങ്ങള് സുരക്ഷിതമാക്കുന്ന മുക്കുവ സമൂഹത്തിനെതിരെ ഉയരുന്ന ഈ വിഷവാദം ഹൃദയവേദനയുണ്ടാക്കുന്നതാണ്.
സമൂഹത്തിന്റെ അരികുകളിലേക്ക് തള്ളപ്പെട്ടിരുന്നിട്ടും, മുക്കുവ സമൂഹം അവരുടെ ആത്മാഭിമാനവും സമുദ്രപാരമ്പര്യവും കൈവിട്ടിട്ടില്ല. മുക്കുവ സമൂഹത്തിന്റെ കഥ, മതം-ജാതി-വര്ഗ്ഗം എന്നീ ചട്ടക്കൂടുകളില് അടയ്ക്കാനാവില്ല. അത് ഒരൊറ്റ ഒഴുക്കുള്ള സമുദ്രം പോലെയാണ് – അതിന്റെ ആഴമേറിയ സൗന്ദര്യവും കടുത്ത പോരാട്ടങ്ങളും നിറഞ്ഞത്.
അമിത് ഷായുടെ പ്രസ്താവന കേരളത്തിലെ തീരദേശജീവിതത്തെയും മുക്കുവ സമൂഹത്തെയും ആഴത്തില് അപമാനിക്കുകയും വേദനിപ്പിക്കുകയും ചെയ്തിരിക്കുന്നു. മുക്കുവ സമൂഹത്തിന്റെ തണലില്ലാത്ത ദാരിദ്ര്യവും പൊതുജനങ്ങളുടെ പരിഗണനയില്ലായ്മയും നോവുള്ള ഓര്മകളാണ്. അതിനാല്, അമിത് ഷാ തന്റെ പ്രസ്താവന പിന്വലിച്ച് മുക്കുവ സമൂഹത്തോട് ജനാധിപത്യപരമായ ക്ഷമാപണം അറിയിക്കണം. മുക്കുവ സമൂഹത്തിന്റെ ജീവിതവും സമുദ്രത്തെ സംരക്ഷിക്കുന്ന പോരാട്ടവും ഒരു ജനതയുടെ മുന്നില് മാതൃകയായി നിലകൊള്ളുന്നു. ഈ സമൂഹത്തിനെതിരെയുള്ള വിരോധാഭിപ്രായം സമൂഹത്തിന്റെ മാനവിക മൂല്യങ്ങള്ക്ക് നല്കുന്ന മാനഹാനിയാണ്.
